یا فاطمه الزهرا

 

نه حرم مشتاقیم نه ایستییم سعی و صفا

من نه میقات ایستییم نه مشعر و حل و منا

واردی عشقیم بیر آدا کعبه اونا شیدا اولوب

بیر گلی من قبله ائتدیم کی آدی زهرا اولوب

عشق زهرانی زر و سیم کلانه ورمرم

بیر توکون ئولسمده مین عدن و جنانه ورمرم

ای قلم درک ائت همیشه اشگیلن عشقون دادین

بی وضو  هئچ  موقع  یازما  دفتره زهرا  آدین

گورسدور  زهرانون  آدی  شاهکار   خلقتی

کائناتون کهکشانون اولدی زهرا  زینتی

حضرت زهرا اولوب نور علی نور جلی

اولماسیدی فاطیمه اولمازدی دنیا جلوه لی

حضرت زهرای اطهر ائتمسه بیر دم نظر

فوری گویلرده اولار خاموش خورشیدو قمر

حضرتون عالی مقامی رتبه شایاندادی

مادحی آلاهدی مدحی سربسر قراندادی

گر اورگ احساسیلن تفسیر قران ایلییه

معنی هر سوره و آیاتی عنوان ایلییه

کل قرانه دییر من ایلدیم تا کی نظر

آیه لرده سوره لرده اولدی زهرا جلوه گر

مدعی قران کی اسلامه گوزل برنامه دی

دقت ائتسون گر اونا آیاتی زهرا نامه دی

احترامین گور نجه ساخلور اونون بیت الحرام

گورمیوق بیز حضرته اما چوخ ایلور احترام

گرچی هامی کعبه ده سبحان و ربه باش اگور

افتخاریلن ولی زهرایه کعبه باش اگور

ای وهابی کعبه نی سن ایله طولانی طواف

کعبه ده عشقیلن ایلر حسن زهرانی طواف

کعبه ده قران الونده عمرون اولسا خاتیمه

عمرووی ضایع ائدیبسن بی علی و فاطیمه

پرچم زهرا تاپاندا اهتزاز عرشه دگر

هر ملک فورا قباقینده اونون باشین اگر

منده گورسم پرچمین کی دائما محتاجیام

هی دولانام باشینه هی سویلرم من حاجیام

اولمادی گرچی اونون قارداشی اولدی قلبی زار

در عوض لطف الاهیدن حسین تک اوغلی وار

گر ئوزی اولدی زمین و آسمانون صاحبی

عرش و فرشون مالکی عدن و جنانون صاحبی

کوثری واردی اولوبدی روح و جانون صاحبی

اوغلیدا اولدی جهاندا کربلانون صاحبی

جمع اولا گر بیر یره هر دوجهانون گویچگی

هاموسنان باش گلر کر ب و بلانون گو یچگی

عالمه غوغا حسینون آدیلن سالماق اولار

بیر توکیلن لحظه ده مین یوسفی آلماق اولار

بیر بئله شاهنشهی زهرا وریبدی پرورش

دامنینده مرد عاشورا وریبدی پرورش

ای قلم یاز فخریلن سن دفتره بومطلبی

هم حسینی قهرماندی حضرتون هم زینبی

گر حسین ظالیم قباقینده دایاندی شیر تک

زینبون اولدی بیانی بیر ایتی شمشیر تک

روبرو اولدی حسین ظلمه ددی یا فاطیمه

فاتح اولدی زینبی شامه ددی یا فاطیمه

قهرمان قهرمان پرور اولوبدی فاطیمه

حیف اولا غمدن ولی گول تک سولوبدی فاطیمه

گرچی اولدی خلقته روز ازلدن حکمران

گر چی تا روز ابد زهرا قالاجاق جاودان

حیف اولا اون سگیز ایل عمری اولوب بیردن خزان

دورد اوشاقی قالدی ؛زهرا یاره لی ئولدی جوان

آلاه آلاه حیف اولا زهرا ئولوب ؛قالدی حسین

روبه قبله گوردی یارین ،روحه اوت سالدی حسین

آلدی آغوشه او جانسیز پیکری ائتدی بیان

من حسینم ای منیم عشقیم بئله یاتما اویان

رحم ائله گوزدن آخان گوز یاشیمه آچ گوزلرون

دور ننه ال چک بلالی باشیمه آچ گوزلرون

سالما گوزدن سن ننه قالو بلانون تشنه سین

تاپشوروبسان سن کیمه بو کربلانون تشنه سین ؟

دویمورام بوسه وریام هر قدرگوز قاشووه

قوی اولوم پروانه ای شمعیم دولانم باشووه

آچ گوزون ای حیدره دنیاده پشتیبان اولان

جان ننه ای سینه سی میسماریلن شانشان اولان

لطمه وردی سیلی؛ حقی گورسدن آئینووه

چرپنان سینه ام فدا اولسون یارالی سینووه

دور ایاقه قویما زینب شدتیلن آغلیا

زینب ایستور باشینه بیر قاره معجر باغلیا

باغلانا گر زینبون بو قاره معجر باشینه

آند اولا گوزدن آخان گوهر کیمین گوز یاشینه

اللی ائیل باشینده بو معجر مصیبتلن قالار

جان ورر؛بو معجری غساله آخیرده آچار

ام کلثوم خردادی همکار اولوبدی زینبه

اللری قوینوندا گریان یار اولوبدی زینبه

ای منه ناز اورگدن نازایلمه  دیندیر منی

ای همای عشق پرواز ایلمه دیندیر منی 

راضیام بیر یول منی دیندیرمگه ای دلبریم

مقدمونده ذبح اولا والاهی عطشان حنجریم

راضیام سرنیزه لر سالسون منی حالدان حالا

سن دیسن لیک بیر دفعه منه  جان جان بالا

عالم معنا دگیبدی محنتونده بیر بیره

لااقل آچ گوزلرون باخ بیر دفعه سن حیدره

ای طبیب هر درده؛ دردون اولدی لیکن بی طبیب

ای منیم مظلوم آنام؛ مظلوم آتام قالدی غرییب

رو به قبله جسمووه قبله ئوزی قان آغلیور

داغ کیمین حیدر سنه عینا یتیمان آغلیور

حیدره خاطیر جانونان کچدون ای جان جهان

منده بو حق اوسته ورم حقه یتمیش قهرمان

ای جوانیم من جوانیمنن کچرم غمزده

حیدر حقین ایلرم تبلیغ من سر نیزده

جان ننه جانان ننه ای دردی بی درمان ننه

بو حسینون جانی ،مظلوم جانووهقربان ننه

شهر پیغمبرده اولدوق گور نه اندازه غریب

بیر نفر ده ئولمگووی  شهریده هئچ بیلمیب

قلبیمه  بیر دردو ماتم چوخ سالبدی ولوله

قورخورام مردم قالا یاسه دوروب قاتیل گله

بش نفر واردی جنازون اوسته ایندی آغلیور

امنیتده باشون اوسته تک تکی دیل داغلیور

من ئولنده جسمیمون دورین آلار تک زینبیم

امنیت یوخ ،قمچی آلتندا قالار تک زینبیم

ای منیم روحیم سنه عرض ارادت ایلورم

/ 1 نظر / 31 بازدید
مجید

سلام عرض الم خدمتیزه چوخ عالی شعر دیریز تشکر الم کی بو شعر لری بیردا قرار وریز تا اوخیاخ و آغلییاق الله اجر ورسین بلزه