شعر جدید

<!

زبانحال حضرت صغری (س)

قلب سوزانیم اولوب هجرونده شانشان اکبریم

اوتدان آرتق یاندرب صغرانی هجران اکبریم

یثرب اهلی گوزلریمندن بیلدی کی من عاشیقم

چون گوزوم اولدی سنون عشقونده القان اکبریم

یعنی قارداش آیرلقدان من سنه قان آغلورام

بس کی دردون ایلیور سینمده جولان اکبریم

بیر مریضم کی طبیبیم سنسن ای زیبا جمال

گول یوزوندن یوخ منه بیر آیری درمان اکبریم

وای منه گر گورمسم بیرده او زیبا صورتی

قالماز عالمده اینان سنسیز منه جان اکبریم

سن کی یوخسان شهر یثرب بیر قفسدی روحیمه

ائو اولوب سنسیز منه بیر غملی زندان اکبریم

هر نمازیمنن سورا من ایلرم فورا دعا

سن گلسن قورتارا بو درد و حرمان اکبریم

آه دلدن نامه لر یازدم سنه گوز یاشیلن

قاصیدیم باد صبا هر لحظه هر آن اکبریم

نامه لردن منتظیر قالدم گله تا بیر جواب

گلمدی سندن جواب ؛اولدوم نوا خوان اکبریم

هی ددیم شاید اوگییم اکبریم ورمور جواب

با ادبسن ایله حقیمده سن احسان اکبریم

سن او گولسن اولماقون گلزاری تضمین ایلیور

بی صفادی ای گولوم سنسیز گلستان اکبریم

سن او گولسن ؛مین بهشت عاشق اولوب رخسارووه

سجده ایلر حسنووه فردوس و رضوان اکبریم

سن او گولسن قورخورام باد خزان دگسون سنه

اوندا برهم ایلیر جناتی ؛طوفان اکبریم

 

قلبیمه الهام اولور گاهی مصیبتلی خبر

غصه دن ناگاه ائدرم اوندا افغان اکبریم

گاهی رویاده گوریم کی بولونوبدور قاشون

بیر بئله رویا منی ایلر هراسان اکبریم

وای منه دوشسه سنه کرب و بلاده اتفاق

ئولمگیم حتمی اولار ؛من ائتدیم اعلان اکبریم

باجلق قالسون هله من عاشق مشتاقووم

مطمئن اول سنسیز اولام خانه ویران اکبریم

بخته باخ قالدم بوش ائولرده همیشه منتظیر

اولمشام لحظه به لحظه ائوده نالان اکبریم

اولدی تنها دورد نفر بوش دودماندا همدمیم

آدلار ی اشگ و غم و آهیله هجران اکبریم

خوش رقیه حالینه سنلن اولوبدی همسفر

ناز ائدور هردم سنه ایندی او جیران اکبریم

بخته باخ بیردن بیره گئتدی تمام عزتیم

عزتیم تنها سنیدون ‘اولدی تالان اکبریم

هئچ کسیم یوخدی عصایه اولمشام همدم فقط

اودا جسمیم تک اولوبدی زار و لرزان اکبریم

بس کی ناله ایلورم آغلور عصا احوالیمه

منلن اولدی بو عصا دردونده گریان اکبریم

بو عصائیلن ائله اعجازی من خلق ایلورم

کی قالب حیران منه موسی ابن عمران اکبریم

آلنمی تکیه ورنده بو عصایه هر زمان

گوزلریمده گورسنور بحر خروشان اکبریم

آند اولا زیبا گوزونده صف چکن کیپریکلره

بیر توکووه چاتمیب ملک سلیمان اکبریم

کاش اولیدون ایندی بیر شانه وریدم زلفووه

اوپریشان زلفووه اولدوم پریشان اکبریم

گل دولانم باشووه قویما منی باشسیز قالام

گل وطنده ور منه سن شان و عنوان اکبریم

گل اقلا منده ئولسم سن من قوی قبریمه

گل گلن یولارووه صغرادی قربان اکبریم

قاره می  گی قوی دئسونلر قارداشی واردی بونون

ختمیمه اوندا گلر مردان و نسوان اکبریم

گر بویووا گوزلریم قبریمده ده دوشسه منیم

سسلرم بیحد اولان احساسیلن؛ جان اکبریم

سن اگر اولسون منیم ختمیمده ؛چوخلاری گلر

هر اتاقدا اگلشر چوخ غملی انسان اکبریم

امرائله اوندا اوزریگ یاندرا قزلار سنه

بد نظردن قورخورام ای حسنی رخشان اکبریم

باخدوقیجان فاتحه خوانلار سنه احسن دییر

چون یوزونده گورسنور آیات قران اکبریم

قاری ‘الرحمان اوخیان لحظه گلمه مجلسه

قاری قرانی ائتمه اوندا حیران اکبریم

اوندا بیلمز یا سنه باخسون و یا قرانینه

چون یازب حسنونده الرحمانی رحمان اکبریم

پس بو صغرا حقلیدی عشقونده افغان ایلییه

عشقووه قربان اولوم آی جانیمه جان اکبریم

گویچگیم ‘ایستگلی قارداش باجووم محتاجووم

حالیمی بیر یول خبر آل اولسا امکان اکبریم

منی کی سندن دویمادم ‘قالدی سینمده آرزلار

سن ولی گوزدن منی سالدون نه آسان اکبریم؟

گوزلرون شاعیر ائدیب بهروز کیمین بیر عاشیقی

لطف ائله تا باغلاسون عشقونده دیوان اکبریم

8/12/1388 بهروز سلیمانی ثمرین

 

 

 

 

/ 0 نظر / 20 بازدید