یا قمر منیر بنی هاشم ادرکنی -آذری

این شعرو برای طشت گذاری محرم 1433 قمری سرودم که الان تقدیم شما بزرگواران میکنم

السلام علیک یا قمر بنی هاشم

مشگلون اولسا اگر ایلمه جادو ،جنبل

هی دعا یازدرب هی ایلمه بیهوده عمل

نه موکل نده جن گزمه ائده مشگلی حل

توصیه ایلیورم هیئته دور فورا گل

سوزووی هیئت آرا صاحب انفاسه دنن

یا ابالغوث چاقر دردووی عباسه دنن

 

گراداراتیده نا اهله گرفتار اولاسان

ایشووه باخمیالار دائما آزار اولاسان

آلنووا تر اوتورا خسته اولوب زار اولاسان

ایش چاتا بیر یره کی رشوییه ناچار اولاسان

ورمه سن رشوه نی آلاهه گورا خناسه

اول پناهنده چتین یرده فقط عباسه

 

گر دیلون جامعه ده حق سوزی ایراد ائلیه

گر اذیت سنی هر جاهل و شیاد ائلیه

قالاسان تک ،هامی غوغائیله بیداد ائلیه

اولمیا بیر کیشی تا کی سنه امداد ائلیه

ائتمه غم ،خاره کمک ایلیجگ یاس عشقی

سنه امداد ائدجگ حضرت عباس عشقی

 

گزمه پارتی ئوزووه تا کی سنون یارون اولا

گورسه بیر ایشده سنه گونده طلبکارون اولا

گئت بیرین تاپ سنون هر عرصه ده غمخوارون اولا

گر الوننده یاپشسا ،آبرودارون اولا

ای حسینچی بئله بیر پارتینی گز اول حساس

بیزه هر یرده اولوب پارتی وفالی عباس

 

حاتم طائی گلیب هامیا احسان ائلیه

ثروتین پخش ائلیه ،بخشش شایان ائلیه

تک به تک هر نفره لطف فراوان ائلیه

باخمیا لیک سنه، سینووی سوزان ائلیه

حاتمه سویله کی بیر صاحب انفاسیم وار

باخمارام ثروتووه  چون منیم عباسیم وار

 

کیم ابالفضله گلیب عرض ارادت ائلیور

من بئله فکر ائدورم عرشی زیارت ائلیور

اتگینن یاپشان کسب شرافت ائلیور

ایاقین قویسا ابالفضل هارا ،جنت ائلیور

بارالهی ور ئوزون یا ر خوش انفاسی بیزه

جنتی زاهیده ور ،لیک ور عباسی بیزه

 

چوخ اساطیری جهاندا یارادب اهل قلم

ولی افسانه دی کلا هاموسی ،اولدی عدم

قهرمانان اساطیریه چک فوری قلم

هانسینون قولاری عباس کیمین اولدی قلم

آند اولا قلب محباندا اولان احساسه

قهرمانلار هامو سی باشین اگیب عباسه

 

بو قدر شعر دل انگیز یازبدی شعرا

بو قدر ائتدی ابالفضلی ستایش ادبا

بو قدر سوز دانشبدی خطبا و فضلا

اولمیبدی آقامون بیر توکونون حقی ادا

ائله دریادی آقام واردی وسیع پهناسی

گرک حیدر بیزه تعریف ائلیه عباسی

 

مرحبا اولسون حسینون اوجا سرلشگرینه

اولا هر لحظه سلام دست علمپرورینه

مین کتابون سوزون اظهار ائلین گوزلرینه

داغلاری واله و شیدا ائلین پیکرینه

دیلده واردی ساوالانون بئله عرفانی سوزی

ائله قد قامته دوشمز بشرون بیرده گوزی

 

آقام عباسه فقط عشق و شهامت یاراشار

مکتب دینده اونا خون و شهادت یاراشار

شاهکار دو جهاندی اونا عزت یاراشار

هامیدان چوخ اونا دنیا بوئی غیرت یاراشار

باغبان بیر ازلی جلوه نی تک یاسه وریب

غیرتون هامسین آلاه فقط عباسه وریب

 

دنن عباسه فقط دیلده اولان محنتووی

علینون اوغلودی والاهی ورر حاجتووی

خالص ایله قاپوسندا عمل و نیتووی

راضی اولماز گوره بیر ثانیه ده خجلتووی

یا ابالفضلی قرا داشه ده یازسون گول آچار

دوت ابالفضل اتگین چون بو آقام مشگل آچار

 

دوشدی بیر مشگله امّا بو علمدارون ئوزی

یاندرب روح و روانین محن و غصه کوزی

جسمیدن قولاری دوشدی یره ،اوخلاندی گوزی

اوجا یردن یخلب توپراقا سورتولدی یوزی

سالدی بیر حاله عمود قولاری یوخ عباسی

دوگولی ات کیمین اولدی او گوزل سیماسی

 

گلدی میدانه حسین غرق فغان ،قدی کمان

تاپدی علقم ده وزیرین او آدامسیز سلطان

گوردی عباسی دوشوبدی سپیلیب هر یره قان

آلدی آغوشه باشین آغلادی بیردن اوجادان

قویدی عطشان دوداقین یاره لی عطشان دوداقا

هی ئوپوب هی ددی یاتما گوزلیم دور ایاقا

 

دولانور باشیمه الان بو بیابان قارداش

قزلارم بو یارالی جسمووه قربان قارداش

وار کیمیم دوتسون الیمنن منیم الان قارداش؟

اصغریم  بویدا اولوبدی  بدنون، جان  قارداش

عمده نقصان یتیشیب سنسیز عزیزیم ائلیمه

قاتیلون چوخلی گولور ایندی خمیده بئلیمه

 

باشون اوستونده حسیندی یره دلخسته دوشوب

سن دوشن یرده یره سالک وارسته دوشوب

عالمون جانی حسیندی ولی جان اوسته دوشوب

کربلا پادشهی عرصه ده بن بسته دوشوب

سندی قلعه ام ،وزیریم ئولدی ،اولوبدور شه ،مات

سربازم یوخدی چخاردار سینمه دشمن آت

 

دای منیم اصغر عطشانیم ئوله آز قالدی

اینجه حلقین بالامون تیر بوله آز قالدی

داغلی قلبیم سه پریلن سوکوله آز قالدی

زینبیم شمرون الینده دوگوله آز قالدی

هر کیمون قارداشی یوخدی، اونا یوخ یار و کمک

وراجاقلار باجمی ،قارداشی یوخ زهرا تک

 

کربلانی بوریب یاره لی بیر یار عطری

منی سرمست ائلیب یار دل افگار عطری

پیکرونن اوجالور گویلره دلدار عطری

قتلگاهونده سنون فاطیمه نون وار عطری

باشوون اوستونه جانانی گتیردون قارداش

کربلا دشتینه زهرانی گتیردون قارداش

 

نجه جبران ائلیم من بو آقر زحمتووی؟

آلاه آرتق ائلسون حرمتووی عزتووی

من کی عباس چکه بیلمیورم محنتووی

نجه آیا آپارم خیمه گهه قامتووی؟

عشقوون واری یری اوصافی فلکده یازلا

دییرم جسمووه بردا ائله مدفن قازلا

 

دردووی بیلسه اگر ام بنین فوری سولار

سن کیمین اوغلی ئولوب تا ئولنینجگ پوزولار

قلبینه قان بو محنده گوزونه اشگی دولار

داخی قبرون اوشاق قبری کیمین خردا اولار

عقل عارفلری دردون ائله حیران ائدجگ

خردا بیر قبریده یاتدی نجه بیر اِنّی کورگ

 

نوحووی بردا سلیمانی یتیر خاتیمیه

سن یازان وقتده توسل ائلدون فاطیمیه

وار ابالفضل تک آقون غم چاقی سن غصه یمه

طشت گذاری سوزودی ور سن حبیب قاسیمیه

مجلسینده اوخیا ندا وره زیبائی سوزه

حضرت فاطیمه احسن دییه تا کی ایکوزه

بهروز سلیمانی یوم عرفه 1390

/ 2 نظر / 35 بازدید
Samad Doostdar Somarin

ba salam khedmate shoma jenabe aghaie Soleimani, az bazdide bloge shoma vaghean khoshhal shodam va az inke mitonam hamchenan ba dostani mesle shoma ertebat dashte basham ebraze khorsandi mikonam, agar che chand salie ke az shoma va mahafele shoma door hastam vali hamishe be yade ruzha va ayyami ke dar mahafele shoma be khosos ayyame Moharram dashtim ehsase ghoror mikonam, omidvaram ke baz ham betonam dar majalese ziba va samimie shoma sherkat konam mojadad tashakkor az zahamate shoma dar tahiie va rahandazie in Blog, be omide didar, Ya Ali,

روح الله خانیان ایوریق

سلام وعرض ادب بر نوکر آستان بی بدیل حسینی /بنده از فعالان شعر عاشورایی هستم /اشعار شما را خواندم وبسیاااااار بسیارررر لذت بردم از این همه احساس وشور در شعر -واقعا ارزشمندن این اشعار امید وارم توفیق دیدار از نزدیک با شما شاعر گرانقدر حسینی نصیب بنده شود