یارقیه

السلام علیک یا اباعبدالله الحسین

آلاها دشمن اولوب باشلادی طغیانی یزید

کربلاده بویادی قانینه ایمانی یزید

بولدی ،یتمیش ایکی جزو ایلدی قرانی یزید

قمر و شمسی یخب ،ایلدی ظلم افروزی

باغلادی قول قولا هشتاده یوخون اولدوزی

---------------

 

ئوز خیالینده بئله فکر ائلدی پیروز اولوب

حیدرون گلشن و گلزاری خیال ائتدی سولوب

بیلمدی نور حسین ،هر ایکی دنیایه دولوب

بیلمدی مظلوم حسینون ابدی مکتبی وار

اولماسا شامیده عباسی اگر ،زینبی وار

 

گلشن دهریده بذر ستمی اکدی یزید

فسق و فحشاده اونون یوخدی تائی ،تکدی یزید

اوتوز اوچ ایلده غروریله نفس چکدی یزید

شامیده زینب قهار ،سسین کسدی اونون

ائله صحبت ائلدی کی نفسین کسدی اونون

 

نصف دنیایه یزید اموی صاحیبیدی

باش اگه منصبینه کُل جهان طالیبیدی

بت کیمین تا کی پرستش اولونا راغیبیدی

ولی جلوه ائلدی نور جلی تک زینب

سندربدی او بتی عینا علی تک زینب

 

سندرا بتلاری دوش نبیه چخدی علی

کعبه ده کُفر اورگین قدرتیلن سخدی علی

تبر الده بت بی جانی یره یخدی علی

شامیده زینبی اما هامی اشراری یخب

قولاری باغلی دوروب بیر بت جانداری یخب

 

عّلم دینی خانم کاخیده برپا ائلدی

آتشین خطبه ائیلن قاتیلی رسوا ائلدی

کربلاده توکولن قانلاری احیا ائلدی

کاخ سبزینده اولوب خواریله شرمنده یزید

بورودی ترّ اونی ،چوخ اولدی سرافکنده یزید

 

سفرا باخدی حقارتلن اونا ،اولدی حقیر

امرا گولدی اونا، چوخ قزارب رنگ امیر

آبروسین آپارب قولاری باغلی بیر اسیر

دیلی اولمادی دییه سوز علینون زینبینه

آجقین توکدی یزید مظلوم حسینون لبینه

 

صاباحی بیر قزی گلدی یاننا نخوتیلن

ددی :زینب کی اسیریدی غم و محنتیلن

قصریمیزده سنی چوخ خوار ائلیب قدرتیلن

ایستیم منده گئدم منزل ویرانه سینه

اونی تحقیر ائلیم تا دوشه غم محبسینه

 

تا یزیدیله او ملعونه هماهنگ اولدی

ائله زینت ائلدی جلوه افرنگ اولدی

گوئیا لشگریلن عازم بیر جنگ اولدی

قویدی بیر تاج باشنا کی واردی چوخ گوهری

رخت تازه گینیب تا ائلیه جلوه گری

 

وردی دستور کنیزانه او ناپاک مرام

سیزده تازه گینون اخذ اولا ویرانه ده کام

بیرده هر تک تکوز الده گوتورون ایندی طعام

دانشاندا منه هی احسن بیحدی دیون

او یتیم لر نجه کی باخدی طعاملاری ییون

 

گلدی ویرانیه القصه او ملعون شجره

گوردی هشتاده یوخون قز اوتوروب اوردا یره

گورمدی هر بیری حُکم ایلوری شمس و قمره

بیر قدم ایسته دی گلسون او خبیثه قاباقا

یا علی ذکر ائلیب دوردی رقیه ایاقا

 

یوز دوتوب زینبه عرض ایلدی ای کان شرف

باشدا واردی بو قزون من بیلورم ایری هدف

جنگ ابریشم و دیبایه گلیب عمه خزف

بو قزون گر آتا سین  قصریده سندردون سن

اذنی ور تا بونودا خوار ائلیم الان من

 

معجرین محکم ائدیب دختر سلطان شهید

قاباقا کچدی اولوب صولتیلن وقری مزید

گورجگین هیبتینی لرزه دوتوب دخت یزید

بو سه ساله ایکی هجده سالیا بنزریدی

یعنی هم فاطیمه همده علی اکبریدی

 

او ددی :کاخ وارمدی کی اولوب چوخلی وسیع

واردی قصریمده منیم تخت بلندیله رفیع

امریمون تابعیدی قشر زیاد،خیل جمیع

بو ددی:کاخووه فخر ایلمه ویران اولاجاق

بو خرابه ائویم آخرده گلستان اولاجاق

 

او ددی :غرق طلا و زر و الماسم من

لباسم چوخ تزه دی ،صاحب اجلاسم من

بو ددی:باخ منه سن ،قدسیه انفاسم من

گوهریم اولماسادا گنج ولا صاحیبیم

قره گیسمده اگر حجب و حیا صاحیبیم

 

او ددی :فخر ائدورم من آتامون رتبه سینه

چیگنینه نصب اولونان اولدوزونا قبه سینه

بو ددی :ناز ائدورم من بی بیمون خطبه سینه

آتوون ریشه سی یوخ ،واردی خبیثه شجری

طلقا زاده اولوب ،اولدی زنانون ثمری

 

او ددی :منصبی وار عالمه سلطاندی آتام

صاحب زور و زر و صاحب عنواندی آتام

بو ددی:با خبر اول شاه شهیداندی آتام

آتووا تا خود محشر هامی لعنت اوخیار

آتامون روحینه هر کس گله رحمت اوخیار

 

او ددی :باخ ئوزوه رنگ جمالون سارالب

اوچ یاشوون واردی ولی غصه سنی تنگه سالب

عمووه  ایله نظر گور نجه غمدن سارالب

بو ددی عاشق اولان هم  سارالار هم قوجالار

باخما عمم قوجالب لحظه به لحظه اوجالار

 

او ددی :حیف اولا آجسان سنه یوخ آب و طعام

کاخیمون مطبخی روشندی منه صبحیله شام

بو ددی :هر یدیگون لقمه حرامیدی حرام

آجدا اولسام الووه تیکممیشم من گوزومی

سن کیمین آلچاقا سندرمامشام من ئوزومی

 

او ددی :آدیمه محبوب امیه دییلر

شانیمه شوکتیمه عالی رویه دییلر

بو ددی :آدیمه دنیاده رقیه دییلر

آسمان شرف و معرفتون اولدوزییام

سن یزیدون قزیسان منده حسینون قزییام

 

او ددی :گورمیورم پس نیه قارداشلارووی؟

اودی کی توز بوریبدی آقاران ساشلارووی

اکبر هانی ئوپه تا گوزلرووی قاشلارووی ؟

بو ددی :گرچی بو غمده دل ناشادیم وار

اکبریم اولماسادا شکر اولا سجادیم وار

 

اوددی :چوخلی گوزلسن ولی سن اولدون اسیر

ناز پرورده سن اما محنون اولدی کثیر

بو ددی:اولسام اسیر اولمامشام لیک حقیر

حق یولوندا بو اسارت غمی عزتدی منه

قولارم باغلانادا عین سعادتدی منه

 

او ددی :شامیده هامی باش اگیب ثروتیمه

 قانه غلطان اولونار چپ باخا کیم قدرتیمه

بو ددی:سجده ملائک ائلیور عزتیمه

قدرتون اولسادا بیر قدرت پوشالی اولوب

شوکتون اولسادا بیر شوکت تو خالی اولوب

 

او ددی :معاویه نون اولمشام اعلا نوه سی

شانی وار هنده نون هر کیم اولا والا نوه سی

بو ددی :سندراجاق شانووی زهرا نوه سی

کیمه فخر ایلیوسن ؟جد و ابون احقردی

منیم   ا ما  نسبیم  فا طمه  ا طهر د  ی

 

او ددی :قمچی دگیبدی سنه جسمون قارالب

گوزووه لکه دوشوب ،کیم سنی بو حاله سالب؟

قولاقون یاره دی گوشوارووی کیم سندن آلب؟

شهر غربتده قالبسان نه یامان حاله یتیم

هانی عباس باخا سنده کی احواله یتیم ؟

 

بو ددی :بیر بئله احواله منی سالدی آتون

جام امیدیمی محنت داشنا چالدی آتون

شمری مامور ائلیب گوشوارامی آلدی آتون

صورتیم گر قارالب عاقبتیم روشندی

عمومون غیرتی عممده منیم گورسندی

 

من یتیمم وررم عرشیله افلاکه تکان

یدی گویده بو منم  کی ائدورم عالی مکان

باخما بو سیلی دگن گوزلر اولوب اشگ چکان

قدرتیم وار آتوون قدرتینی دود ائدرم

تخت و تاجین یخارام من یره نابود ائدرم

 

من یتیمم منه تابعدی ولیکن ملکوت

گوزومون جذبه سینه واله اولوبدی جبروت

من یتیمم با شما سایه سالبدور ناسوت

منه ساری فلکون اللری هر دم اوزانور

بو خرابه باشنا کعبه گلیبدی دولانور

 

او ددی :من ؛ بو ددی :بس ائله من من  ائلمه

آند اولا نهر فرات اوسته کی قانلی علمه

سسوی کسمیه سن گر دیسن بیر کلمه

آتشین آهی اورگدن چکرم الان من

آلارام جانووی بوردا گئده بیلمزسن سن

 

گئت بو اندازه بیزی ایلمه سن قلبی کباب

اکبرون آدی گلیب ،لیلی اولوبدور بی تاب

ایستیور اصغره لایلای دییه غمدیده رباب

ایستیوق قلبیلره بذر غمی ایندی اکگ

ورما دیل یاره سی ،قوی درد ابالفضلی چکگ

 

سن قوناقسان ،قوناقون احترامی لازیمدی

سنه حرمت ائلدیم آلاه ئوزی عالیمدی

یوخسا نابود سنی ایندی ائدن آهیمدی

هم آتون همده ئوزون دوز یولی دنیاده گئدون

قوناقوز واردی ائووزده اونا سیز حرمت ائدون

 

ساخلیون حرمتیلن کر ب و بلانون قوناقین

خیزرانیله یارا ایلمیون دیل دوداقین

دوتور هر لحظه اونون دیر و کلیسا سراغین

یارالی باشه ستم ایلمیون جانی کیمین

اونا حرمت ائلیون راهب نصرانی کیمین

 

گلجک منزل  ویرانیه آخرده او باش

چکجک باشسیز اولان قزلارنا آخر باش

کاش کوفه کیمی یولدا او باشا دگمیه داش

جان ودلدن او باشون گلمگینه منتظیرم

من ئوزوم قربانی اولام یولونا جان وررم

 

ائدورم لحظه شماری  یتیشه وقت وصال

گله ویرانیه بابا قوتار درد و ملال

چرپنان سینمه درمان اولا اول قانلی جمال

قلبیمون باشینه زخمی باشی فورا قویارام

ائدرم بوسه دوداقلارینی ،جاندان دویارام

 

سنه بهروز ،حسین ابن علی ائتدی کرم

قولی تندن قلم عباس سنه وردی قلم

زینب صاحب دم لطف ائلیبدور هر دم

شعرووه سعی ائله سن رنگ ریا قاتمیاسان

گوزله دنیا مالنا عشقووی سن ساتمیاسان

جمعه 25/9/1390

20محرم 1433

 

/ 0 نظر / 13 بازدید