تقدیم به تمام عاشقان حسینی -شجاعت ابی عبدالله -آذری

بسم الله الرحمن الرحیم

شجاعت حسینی و گریز به قتلگاه

 

 

درگه پاک حسینده هر گلن احسان گوروب

اوج   ذلتده   گلنده ،عزت   شایان   گوروب

بی سر و سامان گلنلرده ، سر و  سامان گوروب

دردمند ئوز دردینه اربابیدن درمان گوروب

اهل  ایمان ،درگهینده  جلوه  سبحان گوروب

 

بیز گلگ بو مجلسه، زهرا یازبدی دعوتی

بیزلره زهرا وریبدی ارزش  و شخصیتی

یوخسا بی زهرا کیمون واردی بو جمعده حرمتی؟

لطف زهرادندی والاه اولمشوق بیز هیئتی

عشق زهرادن اورگلر نعمت الوان گوروب

 

بیزده پس قدرین بیلگ بو درگه با عزتون

ای حسینچی پاک گل تا کی چوخالسون حرمتون

اولسون هر ایشده فقط هیئتده قصد قربتون

دوز اگر گلسون گولوم هیئت اولاجاق جنتون

بوردا کج خاری گوروبدی ،دوز ولی ریحان گوروب

 

عاشیقوق واردی بیزیم بیر سینه بی تابیمیز

بیز کی سرمست نگاروق وار می بس نابیمیز

ظلمت ایامیده حُسنی اولوب مهتابیمیز

روز ازلّدن حسین اولدی بیزیم اربابیمیز

بو حسینی هر کیم عاشیقدی فقط سلطان گوروب

 

لبلری عطشان حسینه تشنه لب جیحون قالب

بو شهیده ،دین و قران ایندیده مدیون قالب

گویلرون اهلی بو یارون عشقینه مجنون قالب

تا خود محشر حسینون مدحینه مضمون قالب

مکتب شعر و ادب هر چند مین دیوان گوروب

 

جسمیمیزده رگده کی قاندی حسینون عاشیقی

عنصر و سلولیلن جاندی حسینون عاشیقی

مکتب و آئین و قراندی حسینون عاشیقی

بیزدن آرتق ذات سبحاندی حسینون عاشیقی

حق ،حسینی کبریاده سوگولی جانان گوروب

 

ائتمسیدی حفظ دین اوسته بو مولا گر قیام

مطمئنا دین اسلام ایندی اولمشدی تمام

نه محمدن نه قراندان قالاردی ذکر و نام

آلاهون آدین حسین حفظ ایلیبدی والسلام

بو حسین بیر نهضت بیحد و بی پایان گوروب

 

رگلرینده اولدی خون حیدریلن فاطیمه

پیکر مردانه سی دینه اولوبدی قائیمه

قهرمان عرصه آزادییه مظلوم دئمه

قهرماندور کی حسین باش اگمیبدی ظالیمه

قهرمان ،تنها حسینی  دیده دوران گوروب

 

یکتنه اولدی اوتوز مین جنگجویه روبرو

قلب سرداران اولوبدی هیبتیندن زیر و رو

بیدتک بیردن بیره لرزان اولوبدی هر عدو

سس گلیبدی یا حسین ذکر ایلیون سیز تفلحو

بی حسین هر کس کی اولدی بیر بویوگ نقصان گوروب

 

عرصه ده زهرانون اوغلی سسلدی: ای کوفیان

من   حسینم  نو ر قلب  خاتم  پیغمبران

اطیب و پاکم  وارمدی  بیر  مقام  جاودان

سیز منه دشمن اولوبسوز ،یاوریمدی قدسیان

چونکی منده قدسیان آیات الرحمان گوروب

 

سلسبیل و کوثرم من برترم من رهبرم

یک   سر و  گردن  ز کُل  ماسوا  بالاترم

سیز مقابیلده دوروبسوز گرچی من بی لشگرم

مین دفعه ئولسم دیریلسم ظالیمه باش اگمرم

چونکی اصلان اوغلیام عالم منی اصلان گوروب

 

من حسینم آدیمی خلق اولمیانلاردا تانور

گر سرم بر نیزه باشدیا که در کنج تنور

سرفرازم   سرفرازم   سرفرازم   غرق  نور

پیکریمندن  نور  ربانّیدی  عرشه  قوزانور

عرشون اهلی منده انوار حق یزدان گوروب

 

من ئوزومندن  تا  اولا   قران   مزّین   کچمیشم

آلاها خاطیردی کی من صود امردن کچمیشم

قارداشمنّان عشقیمه خاطیردی بیردن کچمیشم

هئچ کیم اکبردن کچمنزدی ولی من کچمیشم

گوزلریم هر چند آناسین گوزلری گریان گوروب

 

من  امامم  آلاهون  واردی  یانندا  عزتیم

سیز کی جاهیلسوز سیزه روشن دگل شخصیتیم

قانیلن   تضمین   او لوبدی  کر بلاده  نهضتیم

گر  ئولم  وار  بیر  شریک  اطیب  و  با غیرتیم

ئوز باجم زینبدی ،حیدر اوندا چوخ عرفان گوروب

 

ائتمدی   امّا   اثر  گفتار  مولا دشمنه

باشلیبدی   زاد ه  زهرا  جهادین  یکتنه

حمله ائتدی برهم اولدی میسریلن میمنه

قدرتیلن آلاهون نوری شاخب اهریمنه

صدق الله العلینی لشگر شیطان گوروب

 

صفلرون نظمین گلیب میداندا سندردی حسین

رشته   عمر   عدوی  کافری   قردی  حسین

مین ابالفضلدنده باش شمشیر اودم وردی حسین

چوخ یورولمشدی ولیکن دشمنی یوردی حسین

برق شمشیرینده جاءالحقی هر عدوان گوروب

 

بیر کاغذ تک ائتدی پیچیده حسین اوباشلاری

ذوالفقاری پرت ائدردی آسمانه باشلاردی

حاجی گویا داشلیوردی حجده قلبی داشلاری

هئچ ائله بیل ئولممیشدی با وفا قارداشلاری

چوخ شجاعتلی اونی اعدای بی ایمان گوروب

 

شمریلن سعد اوغلی گوردی تا اولوب اوضاع چتین

بیر نفر یوخدی حسینه رزمیده اولسون قرین

هر امیر لشگری ایلور حسین نقش زمین

قاچدلار گیزلندیلر بیر گوشه ده آرواد کیمین

بو ایکی رذلی گورنلر پیکری لرزان گوروب

 

ناظیریدی رزمگاهه روح زهرای بتول

ناگرانیدی خانم زینب کیمین دخت رسول

اوغلی میداندا تکیدی قلبی اولمشدی ملول

لبلرین گورجک دیردی جان حسینیم جان اوغول

لبلرووی حیف اولا زهرا ننون عطشان گوروب

 

گلمسیدی گر شهادت عشقینه مولا حسین

بیر نفری زنده قویمازدی قالا حتی حسین

عشق پاکیلن فنا فی الله اولوب آقا حسین

قلبینه اوچ پر دگیب باتدی قانا تنها حسین

اکبرون داغین گورن قلبی سه پر پیکان گوروب

 

سالدی اوچ پر پیکر نظم جهانی لنگره

یاره لی اندامینه توپراق دونوبدی بستره

صورتی اوسته یخلدی لرزه دوشدی گویلره

قان دئمه زهرا ورن سود آخدی قلبندن یره

جبرئیلده سینه سینده سوره قران گوروب

 

ظلم بیحد و عناد اوسته عربلر دوردلار

وردلار خنجر حسینون بند قلبین قردلار

خنجر اوستوندن یارالی جسمه نیزه وردلار

وردلار از بس کی نیزه سینه سین سندردلار

کربلانون نوحی یارب گور نجه طوفان گوروب

 

بیر شهیدون اوسته میداندان قاچانلار گلدیلر

کینه حیدرده دوزخ تک یانانلار گلدیلر

گئتدیلر نیزه ورانلار داش آتانلار گلدیلر

داش آتانلار گئدجگینده آت چاپانلار گلدیلر

آتلارون نعلی ،حسینی خاکیلن یکسان گوروب

 

آغلادی زهرا ،ادبسیزلر ائدیبلر هلهله

پیکریندن کوینگی چخدی دوشوب الدن اله

ساربانه بند زر ،بارماق قالبدی بجدله

اللری باشینده زینب تا گلیبدی مقتله

باجی لب عطشان حسینین سینه سی عریان گوروب

 

بهروز سلیمانی ثمرین

/ 1 نظر / 22 بازدید
تالار گفتمان اویتـا

با سلام .. شما به تالار گفتمان اويتّا، انجمن ايرانيان دعوت شده ايد. با ثبت نام در اين تالار شما مي توانيد در بحث ها شرکت کرده و از مطالب سايت استفاده کنيد. تالار گفتمان اويتّا داراي بخش هاي شامل جديدترين اخبار سراسر دنيا، جديدترين مطالب علمي، بخش نرم افزار و سخت افزار و مطالب کامپيوتري، موبايل، دانلود جديد ترين کتاب ها و مجلات، ادبيات رمان و داستان کوتاه، سينما، موسيقي،ورزش،درس و دانشگاه،سلامت و پزشکي،مطالب طنز،آشپزي و خانواده و داراي بخش جداگانه جهت سرگرمي و دوستيابي مي باشد