یا زهرا

السلام علیک یا فاطمه الزهرا

درگه زهرادن آیری درگهی من دوگمرم

بیر توکون من عرش و رضوان و جنانه ورمرم

آجدا قالسام شاهلارون درگاهینه من گئتمرم

چونکی زهرا درگهی بیر رتبه والاده دی

اولسا دنیاده سعادت؛ سایه زهراده دی

عزت ایستیسن اگر سسلن دنن ی فاطیمه

نعمت ایستیسن اگر سسلن دنن یا فاطیمه

جنت ایستیسن اگر سسلن دنن یا فاطیمه

حشریده آلجاق اله زهرا حسینون کوینگین

شامل عفو ایلیر عاشیقلرون هر تک تکین

حضرت زهرا بویورسا درده درمان خلق اولار

سائله باخسا او سائلدن سلیمان خلق اولار

گر ایاقین شوره زاره قویسا رضوان خلق اولار

یرده گرچی صاحب باغ فدکدی فاطیمه

گویده ده فرمانده عرش و فلکدی فاطیمه

حضرت زهرانون عشقی روح و قلب و جاندادی

عنصرو سلولیده حاکیم ؛رگیلن قاندادی

مادحی آلاهدی، مدحی سربسر قراندادی

گر مسلمان عشقیلن قران تلاوت ایلیور

حُسن زهرانی گلیب قران زیارت ایلیور

خلق اولوبدی عالم امکان به عشق فاطیمه

گون اولوبدی نیر و تابان به عشق فاطیمه

نازل اولدی احمده قران به عشق فاطیمه

اولمامشدی وحی کوثر ،کوثریدی فاطیمه

قرانی قبل از بو خلقت ازبریدی فاطیمه

کیمدی زهرا ،شانینه واله اولوب جن و پری

وادی حیرتده حیران ایلیب عارفلری

باش اگیبدی حضرته بو خلقتون سرتاسری

چوخ گزیشدیم اولمادی دنیاده بیر کس بنزری

سایه رحمت اولوب دنیایه باشدا معجری

گوهر پاک وجودی بی نظیر و بی بدیل

نوریدن منشق اولوب بو روح ممتاز و اصیل

غیر ممکندی اولا عمری فقط اون سگیز ایل

روز ازل ایلیب تسخیر زمانی فاطیمه

تا ابد تاپدی بقای جاودانی فاطیمه

ایله فکر ائتمه قلم درج ایلور ایندی شطحیات

سجده ایلور حضرت زهرایه کُل کائنات

اولماسا بیر ثانیه گر فاطیمه اولماز حیات

چشمه هر زندگی زهرا کیمین کوثرده دی

خلقتون نبضی بیلون قمچی دگن اللرده دی

چوخلاری اظهار ائدور شاید بقیعده فاطیمه

عشق سویلور نه بقیع ،قلب وسیعده فاطیمه

تختون اوسته اگلشیب عرش رفیعده فاطیمه

هاردا قوزانسا اورگدن سوز و آه فاطیمه

گئت زیارت ائت اورادی بارگاه فاطیمه

حضرت هرانون آدی کبریانون تاجیدی

قُرب سبحان تعالی حضرتون معراجیدی

هرنه مخلوق اولسا والاه فاطیمه محتاجیدی

سبقت آلدی سرعتیلن هر ملکدن جبرئیل

دستماز آلدی دوشوب درگاه زهرایه دخیل

یوز ایگیرمی دورت مینه بالیغ تمام انبیا

آلدلار زهرادن امداد هر بلاده برملا

هامییا ائتدی کمک ،طاهایه ده اولدی آنا

انبیا قالسون هله ،سیر ائتدی عشقون یولارین

بیر سنق قولناندا آچدی مرتضانون قولارین

سینه سی پهلوسی یاره پیکری بیر پارچا قان

مسجیده گئتدی علیدن اوتری اول عرش آشیان  

چکدی دیلدن آه جانسوز،وردی افلاکه تکان

سویلدی ای بی حیالر روح اقدسدی علی

گلمیشم امدادینه شهرینده بیکسدی علی

من ئوزوم کی سیز منه خاطیر بو لحظه زنده سوز

من اجازه ورمیشم یر اوسته سیز پاینده سوز

من اگر امر ایلسم هاموز اوتا افکنده سوز

من ئوزوم بو مرتضانون اولماقنا زندییم

باغلیبسوز قولارین اوندان ولی شرمندییم

کاش آلاه سیزلره بیر ثانیه مهلت وره

رد اولا پرده گوزوزدن ای جماعت یکسره

تا گوره سوز آغلیور محراب و منبر حیدره

ظاهیرا سیز باغلیبسوز شاه مردانون قولون

باغلیبسوز باطینا بو لحظه سبحانون قولون

بیر قولی سیز باغلیبسوز کی سیزه عزت وریب

جنگیلرده اولدی فاتح ،سزلره نصرت وریب

هردعایه قوزاناندا عالمه نعمت وریب

ای جماعت آند اولا قانیم توکولمیش یولارا

آغلیور الان خود مسجید بو باغلی قولارا

آسمان اهلی گلیب حقدن حمایت ایلییه

باغلانان قولدان اولار حفظ و صیانت ایلییه

روح کعبه بردادی ایستور زیارت ایلییه

بو ید لله مین ید بیضایه وردی هست و بود

ناله ایلور بو قولا موسائیلن قوم یهود

سیز مسلمانسوز ولی اسلامی ائتدوز خونجگر

دینوزی ایمانوزی ائتدوز بو ایشلن سیز هدر

تا خود محشر سیزه ایمان ئوزی نفرین ائدر

آی جماعت من دئمیم عشق سبحاندی علی

تز آچون سیز قولارین اخر مسلماندی علی

هئچ اوتانمیسوز سالبسوز سیز بو احواله منی

بوپیمبر زاده ائیلن ایلیورسوز دشمنی

سیز وربسوز سینه پردرده میخ آهنی

قمچی وردوز قویمادوز تا کی قالا بازو منه

هر نفس چکمکده زحمتدی سنق پهلو منه

مین دفعه ئولسم دیرلسم مین دفعه باتسام قانا

حق یولوندا گر ائویمون درگهی مین یول یانا

مین دفعه بازوم سنا پهلوم سنا سینم سنا

هر حالا قالسامدا من حفظ ولایت ایلرم

رهبریم حیدردی من اوندان حمایت ایلرم

آچماسوز گر قولارین من ایلورم اعلام سیزه

گوندوزی اشگیم ائدر بیر لحظه ده آخشام سیزه

باش آچب من شعله آهیله اوت ورام سیزه

گرچی مهر محضم اما سیز غضبیمنن قاچون

خسته دی حیدر عم اوغلوم قولارین فورا آچون

 

 

/ 0 نظر / 24 بازدید